إلى أغلى من ملك روحي 🤍

على كثر ما أقول لج شكثر أحبج وشكثر لج مكانة كبيرة بقلبي، أنا متأكد إن الكلام للحين ما عطاج حقج.

وجودج بحياتي من الأشياء اللي أحمد ربي عليها، وأتمنى دوم أشوفج بخير وفرحانة، لأن فرحتج تعني لي أكثر مما تتخيلين.

بس مهما قلت، ماراح أوفي بحقج، وكلامي مهما كان كثير ما يعتبر شي مقابل مكانتج بقلبي. لأنج بالنسبة لي شي أكبر من إن الكلام يوصفه، ومكانتج عندي ما تشبه أي مكانة ثانية.

وأبي أقول لج بعد إني آسف على كل يوم زعلتج فيه، سواء كان بقصد أو من غير قصد، وآسف على كل كلمة أو موقف ضايقج مني، والله ما كان قصدي أكون سبب في زعلج أو أجرحج بأي شكل.

وما أبي يجي اليوم اللي نهدم فيه كل شي حلو بنيناه بينا، ولا أبي أي زعل أو سوء فهم يكون سبب في إننا نخسر بعض. وإذا تغير مكاني بقلبج بسبب أي شي بدر مني، أتمنى تسامحيني، وأتمنى أرجع لنفس المكان اللي كنتِ حاطتني فيه بقلبج، ونرجع مثل قبل وأحسن، ونخلي كل شي بينا أقوى وأجمل من قبل. 🤍

وعسى ربي يجمعني فيج بالحلال، اليوم قبل باچر يارب، ويكتبج من نصيبي، ويجمع بينا على خير ومحبة، ويخليج لي طول ما أنا عايش، وتكون كل الأيام الحلوة الجاية لنا مع بعض. 🤍

وإذا سألتيني شنو أتمنى من كل هالدنيا، بقول لج بكل بساطة: أتمنى تكونين نصيبي، وأعيش وياج الأيام اللي كنت دايم أتخيلها. 🤍

وعسى ربي يوفقج في كل خطوة تخطينها، ويفتح لج أبواب الخير والرزق والسعادة من أوسع أبوابه، ويكتب لج في كل طريق تمشين فيه خير وبركة وتوفيق. وعسى ربي يبعد عنج كل مكروه وشر ومرض وحزن، ويحفظج بعينه اللي ما تنام، ويطمن قلبج ويشرح صدرج ويرزقج راحة بال ما بعدها تعب.

وعسى ربي يحقق لج كل أمنية خبّيتيها بقلبج ودعيتيه فيها، ويرزقج أكثر مما تتمنين، ويعطيج من جميل أقداره لين يرضي قلبج، ويجعل أيامج الجاية كلها فرح وطمأنينة وخير. وعسى ربي ما يوريج في نفسج ولا في أهلج ولا في أي شخص يعز عليج مكروه، ويحفظ لج أحبابج ويجمعكم دوم على المحبة والخير.

وعسى ربي يرزقج الفردوس الأعلى من غير حساب ولا سابق عذاب، ويجمعج فيها مع كل من تحبين ويعز عليج، ويكتب لج في الدنيا نصيبج من السعادة، وفي الآخرة نصيبج من النعيم، ويجعل كل دعوة دعوتيها في يوم من الأيام ترجع لج أضعاف فرحها. 🤍